Ons land 23:33 op Dubai Internasionaal. Die 3de grootste lughawe in die wêreld. Dis moeilik om te glo, want die busrit tussen die vliegtuig en die terminaal vat 42 minute. Maar ek loop my storie vooruit. Dit was nie ‘n lekker vlug nie. Emirates het snaakse gebruike, soos om jou kombers, kussing en oorfone amper ‘n uur voor landing te kom vat. Vir wat? Lank voor die sitplekgordel-liggie afgaan, staan almal reeds bagasie in die hand gereed om af te klim. Ek was in 41K en ons klim agter uit die vliegtuig. Ek het my handsak en my nuwe klein tassie wat ek pas in België gekoop het.
Ons vat die trappe af bus toe en ‘n jonge dame buig oor en vra of sy my kan help. Ek kyk eers om om te sien waar die tannie is wat ons kan help, toe ek besef sy praat met my. Wat?! Waarmee wil sy my help!
Vir ‘n oomblik is ek verontwaardig. Hoe oud lyk ek? Ek word volgende Donderdag 49 jaar oud. Soms voel ek 50 en soms 35. Hoe oud voel jy? Wanneer was die eerste keer wat jy oud gevoel het? Myne was op ‘n vliegtuigtrap in Dubai.
No comments:
Post a Comment