Saturday, September 22, 2018

Stockholm, Swede: pragtige ou stad Gamla Stan

Ons het die naweek af en is vandag net weer toeriste in Stockholm. Die ICLD was so gaaf om vir ons ‘n bustoer te reël van 10:00 - 14:00. Ons kry ‘n goeie oorsig en saam met ons goeie gids, Evan, kry ons al die inligting. Die massiewe stadsaal waar die Nobel pryse uitgedeel word, die suidelike eiland en die ou stad staan vir my uit. Ons bly agter in die ou stad en stap van winkeltjie na winkeltjie en neem talle fotos. Wat vanoggend as ‘n storm begin het, is nou ‘n pragtige bloulug dag. Uit die boeke uit...

Kyk net hier:




















Friday, September 21, 2018

Totsiens Malmö, hallo Stockholm!

Ons ICLD agent, Jenny Nylund, se waarskuwing aan die groep dat as jy vanoggend laat is, bly jy alleen agter, het gewerk! 08:15 staan almal gepak, uitgeteken, geontbyt en reg om stasie toe te stap met ons bagasie om ons 09:20 trein te vat na Stockholm. Nou moet ek net eers vir Jenny ‘n pluimpie gee. Kyk, om 25 mense van vyf lande uit Afrika te sinkroniseer met Swede se stiptelikheid en begrip van tyd, moet jy hare op jou tande hê. Ek moet erken die groep raak beter soos ons aangaan, maar ek kan boeke skryf oor verskillende mense se begrip van tyd. Wow!

Soos die meeste van julle weet, is Earl Grey tee my gunsteling warm drankie. Dis my ding. Vanmiddag sit ons rustig in ‘n straatkafee en vergaap ons aan die verbygaande mense. In Swede is ‘happy hour’ ‘n groot ding. Van 17:00-19:00 elke dag het meeste eetplekke afslag op ‘n gereg van die dag en op bier. My tee was heerlik!  Ons was vandag net toeriste. Ons moes 600 km aflê tussen Malmö in die suidelike Skäne streek van Swede tot by Stockholm in die middel van die land. Stockholm is die huis van 2 miljoen van Swede se 10 miljoen mense.

Stockholm is ‘n pragtige stad. Ons gebruik 3 ure laat middag om net te loop en kyk. 





Dis waar ek nou is.


‘n Pragtige blomme mark met proteas en krismisrose. 


Waar ons vanoggend begin het in Malmö voor die Sentrale stasie.

Ek moet advertensie maak vir hierdie skoenmaker wat my bootse gratis geplak het. Hulle kon nie die cobblestone strate van ou Europese strate hanteer nie. 

Dit is erfenis langnaweek in SA en ek het baie tyd hier om presies te weet wat ek van SA mis. Waardeer dit. Koester dit. Dit is spesialer as wat ons dink...

Thursday, September 20, 2018

Hyllie se daktuine en waterpark

Die Emporium Winkelsentrum in Hyllie Malmö was vir lank die grootste winkelsentrum in Swede, maar nou is daar ‘n nuwe een gebou in Stockholm wat hierdie reuse stad van winkels onttroon.  Ons het dit vandag besoek. Maar nie vir inkopies soos julle dink nie. Nee, vir die groen daktuine en ‘n verrassende waterpark.






Hierdie klip is glad nie ‘n klip nie, maar herwinde glas waarin lug geblaas is. Dit weeg niks en word gebruik om tuine bo-op dakke te maak.



Ons was aangenaam verras met hul groen corridors op dakke in Augustenborg, Malmö. Hulle het tot die VN se prys gewen vir die groenste voorstad in die wêreld in 2010. Dit was baie interessant. 


Ek is verbaas oor hoeveel mense hier met ‘n Touran ry soos ek. Erg gewild hier. 



Die daktuin op die winkelsentrum. Tuin is die verkeerde woord. Dit is ‘n stadspark. Alles bo-op die dak van ‘n winkelsentrum. 

Ook ‘n pragtige uitsigpunt vanaf die winkeldak op die Öresund brug.



Die waterpark het ons beindruk. Alles leersame fases en gebruik van water op ‘n baie interaktiewe en aktiewe speelse manier. Vir ‘n rukkie was ons kinders. 



En vanmiddag moes ons leer van Communicative Leadership. Goeie groepsoefeninge en lang vervelige gesprekke. Ons het geleer om eerlik te kommunikeer, so ek wil nie jok nie. 

Ek en Alletta moes elkeen twee prentjies kies om ons ‘journey’  met ons change project in Porterville te beskryf. Hier is ons s’n. 

Môreoggend verlaat ons Malmö en vertrek met ‘n trein na Stockholm. Dit is 600km noordoos van hier en heelwat kouer. Malmö het my beindruk. Ek sal maklik hier kan bly. My Sweeds sal net dringend aandag moet kry. 


Wednesday, September 19, 2018

Eslöv, Tesla en die Skarhults kasteel

Ons is vandag Eslöv Munisipaliteit toe so 35 km buite Malmö. Hierdie Tesla van die Suid-Afrikaanse ontwerper en biljadêr Elon Musk, is die eiendom van Eslöv se Onder Burgemeester.  En hy het dit nie gekry vir interessante toesprake maak nie. Dit kan ek julle verseker.  Maar dit was ‘n groot ‘hit’ onder ons groep en hy was onmiddellik ‘n attraksie.
Eslöv Munisipaliteit bedien 33000 mense en het 51 verkose raadslede, 15 op hul Burgemeesterskomitee en 2500 werknemers oor ‘n afstand van 424 vierkante kilometer. Net om dit in perspektief te plaas: Bergrivier Munisipaliteit bedien 70 000 mense en het 13 verkose raadslede met vier op ons Burgemeesterskomitee en 420 werknemers oor ‘n afstand van 4808 vierkante kilometer.  Nee regtig!




Ons besoek die pragtige Skarhult kasteel wat veral bekend is vir hul uitstalling en museum van die rol wat die vroue in die kasteel gespeel het sedert die tweede eeu. Dit was so goed aangebied en so interessant.  

Sikhumbuzo Ndlovu is die Interne Ouditeur van Bulawayo. Hier oefen hy sy Viking pose. Ons het sulke lekker pelle geword. Hy is ‘n dierbare mens en uiters professioneel. 



Vanoggend vroeg kry ons ‘n drie ure lange lesing deur Lars Andersson.  Hy is ‘n kenner op munisipale finansies en stigter van Kommuninvest in Swede. Ons het aan sy lippe gehang. Hy is werklik kundig en ‘n baie goeie spreker. Ek het soveel notas gemaak en planne wat ek wil gaan implementeer. Te veel!

Nog ‘n lewensvriendin uit Zambië, Christabel Mazuba. Sy is ‘n senior rekenmeester uit Lusaka stad.



Hierdie busse in Malmö loop op biogas wat hulle uit afvalbestuur genereer.



Ons het middagete geëet by ‘n organiese groenteplaas waar mense self hul groente pluk en hier laat gaar maak of huis toe vat. 


Hierdie kollega het ook gedink Eslöv se Onder Burgemeester praat bietjie langdradig.


Ek was versot op die kasteel. 


Ons groep by die voorporataal van die kasteel waar die toer begin. 

Ek en Alletta moes die dag gaan afsluit met ‘n bier om alles deur te gesels en vas te lê wat ons geleer het. Die dae begin nou net te vinnig verbysnel.