High tea by die Merrion Hotel in Dublin

 Wat ‘n fantastiese afsluiting vir ‘n uiters besonderse toer. Dit het so gebeur: ‘n paar maande terug neem ek ‘n reeks op wat op BBC uitgesaai word genaamd City Bakes met Sjef Paul Hollywood wat 12 wêreldstede besoek en hulle bekyk uit sy bakkersoog. Ek sien daar’s een oor Kaapstad en ek kyk aanvanklik net hom. Nadat ek reeds met toer na Ysland en Ierland bespreek het, is daar een aand nie beurtkrag nie en ek dog… wat is die kans? En wraggies daar is Paul in Reykjavik en Dublin!

In die Dublin een sien ek die ongelooflikste ding: die grootste kunsversameling in privaatbesit in Europa, behoort aan een van die eienaars van die Merrion Hotel en hulle het besluit hulle kuns is mooi genoeg om te eet. Toe stel hulle ‘n sjef aan wat klein koek kunswerke maak gebaseer op hul versameling. Die sjef kies elke week drie ander kunswerke. Ek was so beindruk dat ek dadelik bespreek het vir 16:00 vanmiddag. 

Dit was onbeskryflik! Kyk maar eerder self. 

Die eerste gang…

Die tweede gang: kunswerk 1

Tweede gang: kunswerk 2

Tweede gang: kunswerk 3

Na die tyd drentel ek terug na Beckett House en bekyk vir oulaas die stad. 

Vanaand is dit pak, vroeg slaap en vroeg opstaan. Ek kry die Dublin Express 05:26 by Custom House Quay en dis 25 minute se stap met al my bagasie!

Cliffs of Moher, Galway en Wild Atlantic Way

 Vandag was uitputtend! Ek is pas na 20 233 treë terug in my kamer in Beckett House. Moeg maar tevrede. 

Ek is vanoggend 05:35 hier uit en moes ‘n vinnige pas insit om by St Greens Park te kom aan die anderkant van die stad waar Paddy Tours mense optel wat die weste van Ierland wil bekyk. 

Die Cliffs of Moher is in die top 10 goed om te sien in die wêreld, laat weet my sussie Corné uit SA. Dit is Ierland se no 1. Baie mense kom daar en sien nooit die massiewe kranse nie as gevolg van slegte weer en mis, maar ons is so geseënd vandag met skoon uitsigte. Dis ver van Dublin af en die volle dagtoer neem 13 ure. Ons het twee ure rondgeloop in die pragtige Galway stad en middagete geniet by Lisconner. 

Die kranse is 214 meter hoog op sy hoogste punt (by die kasteeltjie) en plat af na noord en suid teen die weskus van Ierland na 120 meter. Dit strek vir 9 km!

Die kronkelpaadjies oppad na Moher is dun. Moet asb nie hierdie video kyk as jy motorsiekte kry nie. 

Ek het my Yslandiese mus vandag in die bus klaar gebrei. 

Galway

Oscar Wilde links op die foto

Ontbyt in Galway is ‘n skon met Earl Grey tee. Te heerlik. 

Meer mense in ons bus was moeg vandag.

Ons busbestuurder is Gaelic Iers en uitgesproke. Hy ken sy geskiedenis goed, maar weier om te praat van die 1845 massadood in Ierland as ‘n hongersnood. Volgens hom was dit ‘n genocide onder die hand van die Britte. 

Die nuwe Touran is orals in Europa te sien om elke hoek en draai. Ek kan nie glo dat Volkswagen SA besluit het om dit nie verder in te voer nie!