Gister kon ek nie een foto gelaai kry met die eiland se dataspoed nie. En die inwoners sê dis nou strate beter as wat dit was! Nou probeer ek weer!
Vanoggend het ek Jacob’s ladder gedoen in Jamestown. Dit is 699 trappe wat die bo-dorp (Half Tree Hollow) met die onderdorp verbind. Dis ‘n baken wat van ooraloor sigbaar is en die ding om te doen as jy hier is. My tyd is 27 minute. Mens kry ‘n sertifikaat by die museum vir 3 pond.
En ‘n pragtige sonsondergang oor die hawe om die lekker atmosfeer aan te vul. Die Saints is gawe, gulhartige mense.
Die eiland is 15 km by 8 km en hier bly ongeveer 4000 mense. Daar is 200 kinders in die enigste skool op die eiland van Grd 1-12. Hulle enigste taal is Engels, maar ek was al drie dae hier voordat ek kon hoor dat dit wat die locals met mekaar praat, Engels is… die koningin sou dit nie herken het nie.
Hier is 21 erkende “post box walks” en gister het ons Lot’s wife ponds gedoen vanaf Sandy Bay op die suidkus van die eiland. Moet nou asb nie wit sandstrande in jou geestesoog oproep nie. Hier is Sandy Bay:
Ons sien brilmalgasse broei langs die pad. Klim ‘n styl berg uit en oor tot by die posbus en dan is dit 60 meter afsak met ‘n tou - abseil!
Hier is ek oppad af! Dit was nie maklik nie!
Maar die prys is die moeite werd!
Die broeiende brilmalgas.
Die touleer van onder af! En dis halfpad van dit wat gedoen moes word.
St Helena is voorwaar ‘n fees!
No comments:
Post a Comment