27 April 2019
Vandag is vryheidsdag in Suid-Afrika. 25 jaar na ons eerste demokratiese verkiesing op 27 April 1994. Ek vier dit vandag op twee spesiale maniere. Eerstens vier ek die vryheid wat ons kry in Jesus Christus wat die bron van alle vryheid is. Wat ‘n onbeskryflike voorreg om deel van daai vryheid te kan wees. Tweedens is ons tans omtrent 250 seemyl oos van Durban oppad Reunion toe. Op die MSC Musica. Die toppunt van alle luuksheid dink ek vanoggend toe ons net na 07:00 in die jacuzzi op dek 13 sit. Waar kry ‘n mens groter vryheid as dit? En soos my gedagtes draal oor vryheid dink ek visse se vryheid lê in die see. ‘n Vis is op die vryste in die water. Waar lê my vryheid. Die
sorgvryheid van ‘n vakansie lê in die feit dat mens ‘n werk het.
En die vryheid van ‘n christen lê in Christus. Is jy vry? En waarin lê daai vryheid?
Ons vryheid op see het gister begin in Durban se hawe. Ons het vroeg ‘n Mango vlug gevat uit Kaapstad Internasionaal en 1 uur en 40 minute later vir King Shaka gegroet noord van Durban.
Bheka van EZ Shuttles het ons professioneel en hartlik ingewag by binnelandse aankomste en Sbu het ons kus langs vervoer na die passasiers-terminaal in Durban se hawe. Daar val ons in die ry saam met die ander 3300 passasiers en is opgewonde om aan boord te gaan en ons intrek te neem in kajuut 12088. Elke spasie op hierdie boot is goed uitgelê en benut.
Dis groot genoeg, gerieflik, luuks en heerlik! Ons vergaap ons aan die verskeidenheid van mense. Hier en daar ‘n Suid-Afrikaner (sommer ook uit my buurdorp Porterville), maar meestal Europiërs. En ja julle is reg, behalwe vir die handjievol kinders aan boord, is dit ek wat die gemiddelde ouderdom aansienlik afbring.
Die drie tenore uit SA is ook aanboord en gaan deel uitmaak van die vermaak. Ek woon die inligtingsessie by op dek 6 en 7 in die teater en kom terug met baie interessante brokkies wat ons nodig het om die skip ten volle te geniet. Hier is alles.
Haarsalon, sushi restaurant, gym, spa, drie groot restaurante, ‘n teater wat 1700 mense kan vat, winkeltjies, kroeë vir elke smaak, twee swembaddens, vier jacuzzis, ‘n tennisbaan, mini golfbaan, staproetes op dek 13 en 7, biblioteek, kaartspeelkamer en verskeidenheid oop areas vir sit en tuur oor die see. Dis presies wat ek en my Pa nou doen.
En tussendeur eet ons. Die “ons” is ek en my Pa en Ma. Om te balanseer probeer ons baie stap en baie trappe klim. Ook om op my bed te kom, klim ek ‘n trappie. Goed uitgedink.
Ons seevaart sal 24 nagte duur en ons vaar na Reunion, Mauritius, Seyshells, Aqaba in Jordanië, die Seuzkanaal, Katakolon in Griekeland, Kotor in Montenegro, Split in Kroasië en dan Venisië in Italië. By elkeen van hierdie plekke meer die skip vas en kan mens aan land gaan en die wêreld verken. Vandag is daar ‘n lesing oor alles wat Reunion kan bied. Ek sal vertel soos ons vorder.
Geniet hierdie reis saam met ons. Vier vandag jou eie vryheid. In Christus en in die vryheid van die omgewing waarbinne jy geplaas is om vry te wees.
No comments:
Post a Comment